Վայոց ձորը տեղակայված է Հայաստանի հարավարևելյան մասում: Արևմուտքից այն սահմանակից է Նախիջևանին, իսկ արևելքից՝ Ադրբեջանի հանրապետության: Վայոց ձորը շրջապատված է բարձր լեռներով և լեռնաշղթաներով, որոնք բնական սահման են հարևան տարածքների հետ: Մարզն ունի հարուստ բուսական և կենդանական աշխարհ:
Վայոց ձորը Հայաստանի Հանրապետության ամենաքիչ բնակչություն ունեցող մարզն է: Շրջանի երեք կարևոր քաղաքներն են՝ Եղեգնաձորը, Ջերմուկը և Վայքը:
Եղեգնաձորը Վայոց ձորի վարչական և պատմամշակութային կենտրոնն է: Տեղի բնակիչները շատ պահպանողական է և նշում է գրեթե բոլոր կրոնական և ավանդական տոները: Ամենահայտնի տոնակատարությունը բերքի փառատոնն է, որը տոնում են ամեն տարի՝ հոկտեմբերի երկրորդ կիրակի օրը:
Եղեգնաձորը գտնվում է Արփա գետի աջ ափին: Այն Հայաստանի ամենահին բնակավայրերից մեկն է: Քաղաքի անունը առաջին անգամ հիշատակվել է VII դարում: Որոշ ժամանակ այն հայտնի է եղել որպես Միկոյան՝ ի պատիվ հայ մեծ քաղաքական գործիչ Անաստաս Միկոյանի:
Վայոց ձորի տեսարժան վայրերը
Նորավանք
Վայոց ձորի ամենահայտնի վանքը 13-րդ դարում կառուցված Նորավանքն է: Վանական համալիրը ներառում է Սուրբ Կարապետ եկեղեցին, Սուրբ Գրիգոր մատուռը և Սուրբ Աստվածածին եկեղեցին: Վանքն առավել հայտնի է իր երկհարկանի Սուրբ Աստվածածին եկեղեցով, որի շինարարությունն ավարտվել է 1339 թվականին:
Կառույցը մի իսկական գլուխգործոց է՝ ստեղծված տաղանդավոր քանդակագործ և մանրանկարիչ Մոմիկի կողմից: Նորավանքը վարպետի վերջին գործն է։ Նա մահացել է վանքի շինարարությունն ավարտելուց անմիջապես հետո և թաղվել է եկեղեցու բակում:
2002 թվականին Նորավանքը ընդգրկվել է ՅՈՒՆԵՍԿՕ-ի Համաշխարհային ժառանգության ցանկում:
Սուրբ Աստվածածին եկեղեցի (Արենի)
Արենիի եկեղեցին գտնվում է Հայաստանի Վայոց ձորի մարզի Արենի գյուղի մոտ, Արփա գետի ձախ ափին, գյուղին հարող բարձունքի վրա։
Ըստ եկեղեցու արևմտյան մուտքի արձանագրության, կառուցվել է Սյունյաց արքեպիսկոպոս Հովհաննես Օրբելյանի կողմից 1321 թվականին, ճարտարապետն է Մոմիկը։
Եկեղեցու գմբեթը քանդվել էր 1840 թվականի երկրաշարժից։ 1967–1972 թվականին կատարվել են եկեղեցու պատերի և ծածկի նորոգման աշխատանքներ։ 1998 թվականին պոլսահայ Արտաշես Տյուզմեճյանի բարերարությամբ եկեղեցու գմբեթը վերականգնել է իր նախնական տեսքը։
Եկեղեցու մոտ գտնվում են իշխան Տարսայիճ Օրբելյանի ապարանքի ավերակները, իսկ շուրջը՝ XIII–XVII դդ խաչքարեր և տապանաքարեր:
Արատեսի վանք
հայկական վանք Հայաստանի Վայոց ձորի մարզում, Եղեգիս գետի Արատես վտակի ափին, բլրի գագաթին։
13-րդ դարի վերջին Ստեփանոս արք. Օրբելյանը Արատեսի վանքը իր կալվածքներով հանձնել է Նորավանքին՝ որպես ամառանոց, իսկ 1301 թվականին վանքին է նվիրել Գեղարքունիք գավառի ութ գյուղ։ Վանքում 1303 թվականին գրիչ Խաչատուր Երզնկացին Ստեփանոս արք. Օրբելյանի պատվերով ընդօրինակել է Գրիգոր Նյուսացու «Մեկնութիւն ժողովողին» աշխատությունը։ Վանքի տարածքում կան 10–17-րդ դարի խաչքարեր և տապանաքարեր։
Ջերմուկի ջրվեժ
Վայոց ձորի երկրորդ կարևոր քաղաքը Ջերմուկն է՝ Հայաստանի ամենահայտնի առողջարանը: Այն շրջապատված է լեռներով և խիտ անտառներով և հարուստ է քաղցրահամ ու հանքային աղբյուրներով: Այստեղ կան նաև ստորգետնյա գեյզերներ, որոնք օգտագործվում են ինչպես խմելու, այնպես էլ լոգանքներ ընդունելու համար: Ջերմուկի հանքային ջուրը բուժում է տարբեր հիվանդություններ և նյարդաբանական խանգարումներ:
Ջերմուկի ջրվեժը Վայոց ձորի գլխավոր տեսարժան վայրերից է: Այն Հայաստանի մեծությամբ երկրորդ ջրվեժն է (70 մ), որը գեղատեսիլ շրջակայքի հետ միասին աննկարագրելի բնապատկեր է ատեղծում:
Կեչուտի ջրամբար
Ջերմուկից 3,5 կմ դեպի հարավ, Արփա գետի վրա, գտնվում է Կեչուտի ջրամբարը: Այն կառուցվել է 1981 թվականին` Սևանա լճի ջրի մակարդակը կարգավորելու համար:
Վայոց ձորի բնակչությունը
Ըստ 2011 թվականի մարդահամարի տվյալների, Վայոց ձորի մարզում ապրում է ընդամենը 52 324 մարդ, որից 99,74% հայեր են, 0.15%-ը՝ ռուսներ, 0,04%-ը՝ ուկրաինացիներ:
Եղեգնաձոր
Եղեգնաձորը Վայոց ձորի մարզկենտրոնն է: Այն տեղակայված է Հայաստանի հարավ-արևելյան մասում ՝ Արփա գետի վտակ հանդիսացող Սրկղոնք գետի ափին: Քաղաքը գտնվում է Երևանից 123 կմ հարավ, բարձրությունը ծովի մակարդակից 1194 մ է: Կլիման մեղմ է, բնութագրվում է ձնառատ ձմեռներով և տաք ամառներով:
Եղեգնաձորի պատմությունը
Եղեգնաձորը Հայաստանի ամենահին բնակավայրերից մեկն է: Քաղաքն առաջին անգամ հիշատակվել է 5-րդ դարում: Եղեգնաձորի տարածքը համընկնում է Մեծ Հայքի Սյունիք նահանգի Վայոց ձոր գավառի արևմտյան հատվածին։ Միջնադարում Մետաքսի ճանապարհը անցնում էր Վայոց ձորով: 10-13-րդ դարերի ընթացքում քաղաքում կառուցվել են բազմաթիվ եկեղեցիներ, վանական համալիրներ, կամուրջներ և քարվանատներ:
1747 թվականին, երբ Արևելյան Հայաստանը դեռևս գտնվում էր Իրանի տիրապետության տակ, քաղաքը Նախիջևանի Խանության մի մասն էր և հայտնի էր որպես Քեշիշքենդ: 1935-ին այն վերանվանվել է Միկոյան՝ քաղաքական գործիչ և բոլշևիկյան առաջնորդ Անաստաս Միկոյանի պատվին: 1956-ին քաղաքը վերանվանվել է Եղեգնաձոր:
Եղեգնաձորի տեսարժան վայրերը
Եղեգնաձորը Վայոց ձորի պատմամշակութային կենտրոնն է: Այստեղ շատ են հին եկեղեցիները։ Քաղաքի ամենահայտնի վայրը 13-14-րդ դարերի Նորավանքի վանական համալիրն է: Եղեգնաձորի Զորաց Սուրբ Աստվածածին եկեղեցին ևս մի արվեստի գործ է, որն անհրաժեշտ է տեսնել: Քաղաքում գտնվող 12-րդ դարի Սուրբ Աստվածածին եկեղեցին (հայտնի նաև որպես Սուրբ Սարգիս) ծառայում է որպես Հայ առաքելական եկեղեցու Վայոց ձորի թեմի նստավայր:
Եղեգնաձորից ոչ հեռու գտնվում է Սպիտակավոր Սուրբ Աստվածածին վանքը, որը կառուցվել է 1321 թվականին: 1987 թվականին հայ ազգային հերոս և ռազմական առաջնորդ Գարեգին Նժդեհի աճյունը գաղտնի տեղափոխվել և ամփոփվել է Սպիտակավոր վանքի բակում: Նժդեհը մահացել էր խորհրդային բանտում 1955 թվականին։
Եղեգնաձորից ոչ հեռու է գտնվել 13-14-րդ դարերի նշանավոր հայկական կրթօջախ՝ Գլաձորի համալսարանը, որը գործել է մինչև 1340 թվականը: 1984-ին՝ Գլաձորի համալսարանի 700-ամյակի առթիվ, Վերնաշեն գյուղի Սուրբ Հակոբ պատմական եկեղեցում ստեղծվեց «Գլաձորի համալսարան» պատմամշակութային արգելոց-թանգարանը:
Քաղաքում կա հնագիտական թանգարան, ինչպես նաև գեղարվեստի դպրոց, մարզադպրոց և երաժշտական ակադեմիա: Եղեգնաձորի հայտնի բերքի փառատոնը տեղի է ունենում ամեն տարի՝ հոկտեմբերի երկրորդ կիրակի օրը: Այստեղ մեծ շուքով և ուրախությամբ են նշում նաև Տրնդեզն ու Վարդեվառը։