Յուրաքանչյուր երկրում մշակված են զբոսաշրջային ծառայությունների մատուցման սեփական կանոններ, որոնք, որպես կանոն, ունեն
ընդհանություններ և մի շարք տարբերություններ:
Վերջիններիս հիմքում ընկած են ծառայություններ մատուցող երկրի զբոսաշրջային յուրահատկություննեը, մշակույթը, ազգային որակները: Հայաստանի Հանրապետությունում զբոսաշրջային ոլորտը կարգավորվում է ՀՀ Սահմանադրությամբ, «Զբոսաշրջության և զբոսաշրջային գործունեության մասին»
օրենքով, «Քաղաքացիական օրենսգրքով», «Աշխատանքային օրենսգրքով» և այլ իրավական ակտերով:
Զբոսաշրջային գործունեության ընթացքում իրավաբանական անձանց կամ անհատ ձեռնարկատերերի կողմից մատուցվում են զբոսաշրջային ծառայություններ: Զբոսաշրջային ծառայությունները բազմազան
են. դրանք ուղղված են զբոսաշրջիկների պահանջմունքների բավարարմանը՝ տեղաբաշխման, հյուրանոցային, տեղափոխման, էքսկուրսային,
սննդի կազմակերպման և մատուցման, մշակութային, մարզական բնույթի միջոցառումների, հանգստի, զվարճանքի կազմակերպմանը և այլ
ծառայություններ: Զբոսաշրջային գործունեությունն իրականացնում են
զբոսաշրջային օպերատորը և զբոսաշրջային գործակալը: Զբոսաշրջային օպերատորի գործունեություն են իրականացնում այն անձինք, ովքեր
ձևավորում և իրացնում են՝
շրջագայություններ, կոնգրեսներ, համաժողովներ և նմանատիպ
այլ միջոցառումների կազմակերպման և անցկացման, ինչպես նաև
դրանց հետ անմիջականորեն կապված ծառայություններ (փոխադրման
պայմանագրերի կամ տոմսերի իրացման, հյուրանոցներում տեղերի ամրագրման, զբոսաշրջիկների տեղաբաշխման, սննդի կազմակերպման և
մատուցման):
Զբոսաշրջիկների հանգստի և ճանաչողական նպատակներով,
մասնավորապես՝ թանգարաններ, հուշարձաններ և այլ զբոսաշրջային
օբյեկտների այցելությունների կազմակերպման ծառայություններ:
Զբոսաշրջային օպերատորի մատուցած ծառայությունների ամբողջական համալիր փաթեթը կոչվում է զբոսաշրջային արդյունք, որի խթանման և իրացման գործունեությամբ զբաղվում է զբոսաշրջային գործակալը՝ տրամադրելով զբոսաշրջային փաթեթ: Զբոսաշրջային գործունեությամբ զբաղվող անձի նկատմամբ պահանջն է գրասենյակային տարածքի առկայությունը՝ սեփականության կամ օգտագործման հիմունքներով:
Գրասենյակը պետք է ունենա զբոսաշրջային օպերատորի անվանումը և
գործունեության բնույթը ներկայացնող ցուցատախտակ, հեռահաղորդակցության ժամանակակից միջոցների առկայություն և հաճախորդների համար սպասարկման համապատասխան տեղեր(աթոռ, բազկաթոռ):
Զբոսաշրջային օպերատորի գործունեություն իրականցնող անձը
պարտավոր է գրասենյակում՝ հաճախորդի համար տեսանելի մասում,
տեղադրել հետևյալ տեղեկատվությունը.
1. պետական գրանցման վկայականի պատճենը
2. սպառողի հետ կնքվող պայմանագրի օրինակելի ձևը
3. զբոսաշրջային արդյունքի իրացման համար ձևակերպվող փաստաթղթերի օրինակները
4. իր կողմից ձևավորված զբոսաշրջային արդյունքին վերաբերող
գովազդային օրինակները
5. Հայաստանը ներկայացնող տեղեկատվական, գովազդային և այլ
նյութեր
Զբոսաշրջային գործակալի գործունեություն իրականցնող անձը պարտավոր է գրասենյակում՝ հաճախորդի համար տեսանելի մասում, տեղադրել հետևյալ տեղեկատվությունը.
ժամանման երկրները ներկայացնող տեղեկատվական, գովազդային և այլ նյութեր, վտանգավոր երկրների ցանկը,
անձնագրային և վիզային ձևակերպումների վերաբերյալ տեղեկատվական նյութեր,
ժամանման երկրների ազգային սովորույթների, կրոնական ծեսերի, սրբավայրերի, բնության, մշակույթի, պատմության և զբոսաշրջային
հետաքրքրություն ներկայացնող այլ օբյեկտների, հատուկ պահպանվող
հուշարձանների, օրենսդրական, կրոնական պահանջների և արգելքների վերաբերյալ այնպիսի տեղեկատվական նյութեր, որոնք անհրաժեշտ են շրջագայության ընթացքում: